ភ្នំពេញ៖ នាយករដ្ឋមន្ត្រីកម្ពុជា សម្តេចតេជោ ហ៊ុន សែន បានលើកឡើងថា ការបើកលុយតាមធនាគារតាមបែបប្រព័ន្ធអេឡិចត្រូនិក គឺមានភាពរហ័សលឿនទាន់ចិត្ត និងធានាដល់ការប្រឆាំងប្រយុទ្ធអំពើពុករលួយ។

សម្តេចតេជោបានមានប្រសាសន៍ថា៖ «បើកលុយសុទ្ធ ឯណាសុវត្ថិភាពនៃការដឹកលុយ ទៅដឹកតាមរតនាគារទាំងអស់ ហើយបញ្ចេញទៅតាមរតនាគារ ហើយត្រូវធ្លាក់ទៅអង្គភាព ឬស្ថាប័នណាមួយ ត្រូវបើកលុយចេញពីធនាគារ យកទៅចែករាប់ កាត់ក្បាលលុយ មួយទៀតបង្កើតជារឿង មន្ត្រីខ្មោច ឬទាហានខ្មោច»។

នាយករដ្ឋមន្ត្រីកម្ពុជាបានលើកឡើងថា ការអនុវត្តបើកលុយតាមធនាគារ បានធ្វើឱ្យរកឃើញមន្ត្រីខ្មោចរាប់ម៉ឹននាក់ ដែលមានតែឈ្មោះ តែអត់មានវត្តមានក្នុងម៉ោងការងារ។

សម្តេចតេជោបានលើកឡើងថា៖ «អ្នកខ្លះមនុស្សម្នាក់ធ្វើការ៣កន្លែង ធ្វើការនៅក្រសួងនេះឈ្មោះនេះ ធ្វើការនៅក្រសួងនោះឈ្មោះនោះ អ៊ីចឹងទេយើងប្រើប្រាស់ប្រព័ន្ធបច្ចេកវិទ្យាព័ត៌មាន ម្ខាងជំរុញល្បឿននៃដំណើរការ និងម្ខាងទៀតរុញបញ្ហាឌីជីថលអនឡាញនេះប្រឆាំងអំពើពុករលួយ»។

សម្តេចតេជោ បានកោតសរសើរដល់អគ្គនាយកដ្ឋានពន្ធដារ ដែលប្រើបច្ចេកវិទ្យាទំនើបក្នុងការប្រមូលពន្ធ។ ជាមួយគ្នានេះ សម្តេចក៏បានសង្កេតឃើញថានៅតាមបណ្តាក្រសួងនានាក៏ចាប់ផ្តើមប្រើប្រាស់បច្ចេកវិទ្យាព័ត៌មានក្នុងការអនុវត្តការងារផ្សេងៗប្រកបដោយសុវត្ថិភាព និងលឿនរហ័ស៕